【Viu】Anson Lo盧瀚霆、黃德斌、簡慕華、Jeffrey魏浚笙、Asha徐㴓喬等，噚日(11號)為ViuTV新劇《百萬同居計劃》拍外景，雖然教主今次係第一次同Jeffrey合作，但佢哋一拍即合，教主大讚Jeffrey好玩得，仲係劇組嘅開心果添！劇集仲有一個星期就煞青，而拍完劇，教主都要即刻投入MIRROR紅館騷嘅綵排，而講到演員會飛，教主都話好多親戚都想睇，雖然佢都唔知自己有幾多飛俾父母，但佢都話幫到就幫，認真乖仔！
而男神Jeffrey喺劇中雖然經常同靚女Asha出雙入對，但原來佢哋並唔係一pair，只係Jeffrey單戀對方，Asha仲斬釘截鐵咁拒絕佢添啊陰公！不過現實中嘅Jeffrey就未試過單戀嘞，事關佢同女朋友都拍咗拖7年，冇機會單戀啊！另一邊廂，簡慕華就好開心今次新劇完成咗佢嘅心願，就係同《大叔的愛》班底嘅演員多啲群戲嘞，至於可唔可以開拍《大叔的愛》續集，德斌就話睇緣份，事關佢都控制唔到，因為會牽涉好多制作以及版權問題，不過德斌提議可以考慮推出電影版先喎！
