【Viu】日本通杜如風今日為日本連鎖藥妝店開幕擔任嘉賓，話晒足足有成兩年冇得返「鄉下」，佢笑話都儲落5位數字彈藥準備等陣血拼！傳日本即將通關，但杜如風話冇心郁郁，因為忍唔到返香港要隔離：「我好驚畀人捉去『糟糕灣』呀！捉咗去就真係糟糕啦！」講到日元早前兌港元跌穿6算，不過杜如風竟然話冇趁低吸納：「我媽唔肯買，覺得佢好冇投資嘅眼光！但我好聽我媽講嘢嘅，唔會駁嘴。」
下星期一（16日）就係杜如風嘅牛一，佢話當日諗住同朋友食麻辣火鍋慶祝，身邊都暫時未有追求者，踏入第9年冇拍拖，講到明好dry！而上次佢上《戀講嘢》自爆戀史，話曾經同偶像男藝人拍拖，一齊去謝霆鋒屋企拜年，匿入車尾箱避狗仔隊，事後全城競猜男藝人係邊個，杜如風話唔開名，但就再畀tips指同對方至今仍然都係好好嘅朋友，咁大家可以再估吓啦～
