【Viu】「索膠」Hillary自認愛洪卓立（Ken）後首次出席公開活動，有愛情嘅滋潤心情靚爆！講起NFT熱潮，佢話呢方面男朋友比自己更有研究，對方嘅虛擬銀包有無數咁多個NFT，但講到真銀包啦喎⋯就梗係放Hillary抱狗仔相啦！
一提起Ken，Hillary冧樣畀男朋友滿分：「佢好細心、我講過嘅嘢都會記得，有時唔使講已經知我想點，仲要做埋出嚟，係真心明白我！」仲話其實冇諗過要收埋戀情，只係想搵個合適嘅時機公布啫！問到之後有冇機會同男朋友一齊開工？Hillary話希望有機會，咁如果《膠戰》開第三季，會唔會邀請Ken做嘉賓呀？佢笑話呢層唔到佢話事，但就爆原來《膠戰》family一早知佢拍拖，個個都幫佢保守秘密，講講吓再爆埋已經見過雙方家長：「屋企人覺得佢好斯文、好高、有禮貌！」一率正評呀！Hillary仲對Ken嘅認愛宣言「當然我會努力，令她成為『貪慕虛榮』的人」勁冧豬，話Ken講得出呢番說話係代表想畀幸福佢，真係想甜死人咩！
同場仲有首次以歌手身份出席活動嘅蘇麗珊，佢趁機預告下個月會出新歌。而佢嘅按摩店九龍城元祖店無奈被逼遷，淨番銅鑼灣分店，但蘇麗珊興奮宣布喺尖沙咀再開舖，聽日正式試業，有信心可以搵番停業損失數字！
