【Viu】混血索模Amy Lo（盧慧敏）被邀去到位於灣仔嘅一間素食餐廳率先試新菜式，美食當前見Amy都難以忍口！原來佢私下茹素多年，自爆呢個轉捩點係有日喺餐廳望到廚房入面切肉、煮肉嘅過程：「突然有種感覺係想避開（食肉），之後慢慢盡量唔食肉、有血嘅嘢。」繼而再被一位廚師啟發，喺疫情期間修讀Plant-based（植物性）課程，進一步了解素食主義，而另一樣令Amy獲益嘅就係身體健康咗，皮膚、腸胃、濕疹情況都有好轉。
成個人由內靚到外，難怪首度入圍美國電影評論網站 TC Candler「全球百大美女」網上選舉，Amy即刻搞笑轉講得獎感言mode：「多謝大家！多謝媽咪、爹哋！」又話平時唔係好留意呢啲選美榜，一睇先知同偶像、韓團BLACKPINK成員Lisa、Jennie一齊入榜，感覺好榮幸：「大家對靚嘅接受能力好大，唔再一定係白雪雪、公主咁樣，我呢粒癦原來都入到百大美女！我係好鍾意嘅，只係細個有好多人叫我脫咗去，入圍都令自己多番啲信心，我會keep住個榜入面有自己個名！」最後Amy透露依家拍緊電影同劇集，回復作戰狀態咁話！
