【now.com】無錯，又係Leon，唔係懶得去諗題目，而係Leon又有新搞作，仲要繼續有創舉，唔到你唔服。
講緊昨日傍晚，Leon又以明福俠身份現身，今次同大家公布好消息，話早前在中環海濱舉行的4D演唱會，將會製作成Blu-Ray發售，但今次發售模式並不是提醒你哪年哪月哪日到唱片舖買，而是於網上作率先預訂，而且為確保有一定數量，標明每隻賣200元（另加運費），要儲夠10,000個訂單才落實印製。
Leon講明你鍾意買就買，唔買就唔會逼你買，一早就講明有10日時間俾大家慢慢諗。結果，個post推出短短6小時左右，10,000張訂單已經達標，數字還在上升呢！其實這個預訂做法，有點似近年大熱的網上集資。一件全新Product，未知市場喜惡，又怕製作出來反應欠佳賠了本，於是實行網上集資，有興趣的可先課金預訂，作為對創作者一份支持。對創作者而言，既預先得到資金，又可提早得知市場反應，令落差減至最低。
事實上，Leon此舉並非要試探市場，反而是一種宣傳方式，讓這既有的舊式產品，獲得新鮮的包裝。你可知道今時今日，10,000張實體影音產品銷量，是個甚麼數字？誇張點說，這是個久違的「天文數字」！自從香港樂壇踏入衰退期，近年只要有張唱片可以賣到千隻，已經是一宗喜事，要開香檳。樂壇奇葩吳業坤夠紅吧！收錄他的飲歌《原來他不夠愛我》的EP《KWAN GOR 坤哥》，至今便賣出超過10,000張。試想想，要有這種百年難得一遇的樂壇現象，才成就出這個銷售數字，可想而知達5位數的銷售數字，要經歷幾多艱辛，遇上幾多個際遇才做得到。今天的黎明，6小時便做得到，還要記住，預訂只在facebook進行，即未有照顧到內地龐大的市場，他真的唱得出做得到，超出100樣可能。
當然，表面上只是花了7小時，內裡還未計及經歷30年來，跟樂迷培養的感情，多年來儲下的金句，還有開不成show時流下的汗與淚，這一切一切，才是製作這張Blu-Ray的最昂貴成本，此碟無價。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
