【now.com】話說黎明將於4月28日至5月3日連開六場30周年演唱會，名為《Random Love Songs 4D in Live 2016》，演唱會名真係好Leon，因為佢份人夠晒random，既創新，又夠膽死，完全令人捉摸唔到，在中環海濱搭棚搞演唱會喎，有人估到咩？
作為臨老入花叢剛剛先鍾意咗Leon的fans，見到呢個消息當然興奮到腦充血，惟獨是要彈吓張海報唔靚囉，Leon黑口黑面嘅，Leon咁親切係從來唔會黑口黑面㗎嘛！
同埋4D俾人好大幻想空間，睇戲4D通常又噴水又香味又震動，唔通Leon都玩呢啲？即是唱《送你一瓣的雪花》時就噴水飄雪兼開大冷氣，俾你落雪感覺；《一夜傾情》的「紅日西斜，霓虹折射」，就整個鹹蛋黃出嚟；《夏日傾情》一唱「是你嗎？手執鮮花的一個」就噴出鮮花香味；然後介紹佢口中「肥過部電單車」的衛蘭出場時，觀眾坐椅就好似電單車引擎一樣震動。諗落又幾好玩喎。
但唔會啦，今時今日已成諧星嘅Leon又點會咁正路？會唔會呢個4D其實係一個gag？「大家好嘛，我係Leon，今日呢個4D演唱會，我為大家帶來4個D！第一個D，係『興奮啲』！咁難得搞一個戶外嘅戶內show，大家high啲啦！第二個D，係『細聲啲』，始終都係中環，高級地方，high得嚟都要有啲矜持喎。第三個D，係『企多啲』！香港人睇騷唔好咁悶啦成家人坐低晒，企起身一齊跳啦！第四個D，係『烏低啲』，企係要企，不過呢個場係平地，大家企得嚟又要體諒吓後面睇唔到，有時要烏低少少喎。」
幻想好耐先睇到所謂4D係指立體視覺同埋環迴立體聲效果，吓？我先唔信今時今日嘅老黎會咁冇誠意同創意囉！不過老黎次次都surprise到我，所以都係打定輸數好啲。不過話時話，莫講4D，俾夠你36D都冇用，買到飛先講啦，一場得四千幾個位，當你一半公開發售都得二千幾，仲要同黃牛搶，我估開賣唔使幾分鐘就賣清，到時又要用天地線打俾Leon：「Leon，我係阿May呀！我排第尾呀！」
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
