【now.com】黎明取消首晚演唱會，真係大鑊，嚟緊仲有7晚，都唔知搞唔搞得成。我當然希望佢今晚開始順順利利，其實不如咁，即刻請細女返來睇騷，佢入唔到場，自然即刻打個電話俾daddy再遞俾職員聽，到時就可以特事特辦，莫講話開騷，開通宵都仲得。當然啦，講吓笑啫。
事件重點之一，落在帳篷上，中國製帳篷未能符合英國安全標準，可能會被燈光引燃，所以唔批。當然係貪平，一開始唔貪平直接用外國貨就唔會有呢件事發生，問題是香港而家有乜係唔貪平而用大陸貨？想買樓，建築用料平得就平，水管接位用鉛喉都夠膽死，鋼根水泥全部都唔係以前嘅上等貨。想搭車，巴士開始轉國產，地鐵又一樣，冇得揀就焗坐，但我真係唔安心。想食飯，隨便去茶餐廳睇，食材、調味料大部分係國產，連隻水杯都係淘返來。
講真，所謂安全標準，梗係越嚴越好，一個帳篷下面可以有幾千人，一燒著將會係超級慘劇！睇場騷為開心，但命仔都好緊要，牽涉到安全就梗係跟個真係安全嘅安全指引啦！我都想建築材料、交通工具、食物可以有咁嚴格把關，最好跟外國最嚴嗰個標準，至少食塊午餐肉都唔使擔心有冇重金屬超標。
黎明fans可以換個角度，正面啲睇件事。第一，你可能已經執番條命仔，可能你覺得係風涼話，但災難嘅嘢話嚟就嚟，有時好難講。第二，尋晚大家已經睇到Leon比起上台唱歌跳舞更加精彩嘅演出，我唔係話佢做得啱定錯（呢個真係唔敢跟車太貼），而係佢嘅一力承擔，真係man到震。佢冇等公司發聲明，冇出律師信叫人小心講嘢，冇即刻放假留低個爛攤子俾下屬，冇推個女人出嚟食死貓，冇叫演唱會製作部出嚟搞掂佢，亦冇用語言偽術試圖避過呢塊「類似帳篷的不知名物品」引起嘅事件。佢自己第一時間在現場安撫受害者，鞠躬道歉，仲拍幾條片講清楚發生乜事，將責任攬上身（喂，可能真係有啲嘢唔關佢事喎）。你諗吓，佢拍片講嘅每句說話，都有法律責任，甚至乎會有超出自己責任嘅事要承擔，但佢都肯做。
如果我係公務員，真係寧願佢做高官甚至特首。現屆政府已經葬送咗好多部門嘅公信力，因為決策人唔負責，執行者自然成為眾矢之的。好似警察、ICAC、水務署、機管局、廣播事務管理局、教育局等等，全部都收過好多社會爭議order，但從來冇一個上司，會行出嚟將責任承擔。邊隻手打人就斬邊隻手，其實係個腦做決定但從來冇責任要負。呢個時候，如果有個黎明走出嚟同所有人講：「唔好意思，講清楚件事先，唔關任何其他部門事，係我哋決策人有責任諗點樣做好件事，雖然一樣係政策，但而家係中國制，同英國制係唔同嘅。所以唔關部門事，希望大家明解，唔好意思。」咁件事係咪清楚明白好多？起碼唔需要為一件事全香港人來來回回指罵幾個月，又何來咁多社會矛盾？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
