【now.com】黎明又再一次引起效應，《情深咖啡未曾飲》爆就唔需要多講，坊間對於毛記廣告效應嘅研究亦如雨後春筍標晒出嚟。物極必反，亦留意到好多醒目仔挑通眼眉，覺得啲人早幾日《萬千呃Like賀台慶》先鬧到體無完膚，轉頭《情深咖啡未曾飲》又洗爆版，根本精神分裂。
首先我覺得《萬千呃Like賀台慶》係over-criticized。打個比喻，阿媽每晚煮飯都有水準，偶然有一晚失手，你咪話佢知邊度出問題囉，唔需要一開口就：「阿媽，你回晒塘喎！」或者「阿媽，你得小聰明就唔好學人煮咁大壇嘢啦！」
當然毛記唔係你阿媽，或者你當係個普通朋友啦，即是正常人，有基本同理心，都唔需要第一時間奚落一個向來有良好reputation而偶然失手嘅人。講真，俾錢嘅實惠都未嘈，你覺得唔好睇，咪話唔好睇囉，或者咪熄機唔好睇囉，唔需要叫人收檔咁盡啩？唔需要立即清算人哋淨係識二次創作改吓歌詞仔啩？
記住呢間唔係坐擁慣性收視然後每晚餵你食《殭》嘅大台（題外話，尋晚出街買杯雪糕，返到屋企殭屍變咗未來人，有冇人好心話我知發生乜事？），而係嘗試顛覆舊媒體生態嘅網絡平台，佢仲有好多可能性，包括可能不斷令你失望，但俾佢試啱一次，可能世界從此就不一樣。
就正如黎明《情深咖啡未曾飲》，同甩轆台慶相隔不過三日，就已經從地獄又回到神枱，而呢個廣告，肯定已經顛覆咗往後廣告嘅做法。喂，原來客戶係可以用TVC嘅資源去做網絡廣告，又收得返效果喎。將來你可能見到有相機公司搵梁朝偉拍《瀟瀟灑灑的給我瀟洒的相機》，或者香港政府搵古天樂拍《今期流行，流行搬嚟橫琴》，唔得咩？
一餐還一餐，一單還一單，總之我唔會覺得前幾日批評完甩轆，過兩日又捧到上天有幾精神分裂。只要有誠意做，又敢求突破，就值得放長雙眼睇落去，而且呢個moment，其實大家都係想睇黎明啫。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
