終於等到！由古天樂、林峯、宣萱、郭羨妮等原班人馬演出嘅電影版《尋秦記》，將會喺除夕12月31日上映。未有得睇戲之前，由古天樂、林峯合唱嘅新版《天命最高》已經出街！
古生話今次同阿峯合唱，同當年獨唱原版比較係全新體驗。阿峯就話上次喺紅館演唱會上合唱《天命最高》，某程度已做好熱身：「今次當然再認真啲，有重新編曲，今次都係warm up，同老闆合唱嘅warm up，我希望繼續有屬於我哋嘅歌，最好跳埋舞。」
講到《天命最高》呢4個字，古生話係一個使命：「呢個世界冇最高，但我哋盡力去做啦，等於我哋拍《尋秦記》咁，過程裏面經歷好多困難，但都一一克服。今日可以再一次令大家起雞皮，聽呢首歌的話。」阿峯就話開頭有一下馬叫聲，係集體回憶嚟！
至於喺MV當中，除咗「項少龍」古天樂、「大王」林峯之外，烏廷芳（宣萱 飾）、琴清（郭羡妮 飾）、善柔（滕麗名 飾）、李斯（陳國邦 飾）等亦一一亮相，仲有唔少新角色 Galie（白百何 飾）、Ken（苗僑偉 飾）、石頭（張繼聰 飾）、 聞桑（廖子妤 飾）等，正啊！
