【Viu】林峯一連7場紅館騷《GO WITH THE FLOW 林峯演唱會》今晚尾場，老婆張馨月帶埋4歲愛囡「格格」Luna現身撐場，格格勁cute又超淡定，對住鏡頭喪揮手！開場後見張馨月舉機影低阿峯嘅英姿，唱到快歌嗰陣又同Luna喪揈螢光棒，兩母女應援力MAX！
話晒係尾場，嘉賓方面就梗係重量級啦！「龍捲風」古天樂「吹」到嚟紅館，終極登場！而最驚喜嘅係佢今日嘅身份變咗《尋秦記》嘅「項少龍」，着住制服半跪出場引哄動！隨後同「嬴政」阿峯合唱劇集主題曲《天命最高》，呢單嘢堅係大癲！一起歌「誰求誰⋯」真係omg，簡直係回憶殺！全場一見到呢個世紀組合high到爆，啲尖叫聲加埋絕對係會令分貝破表！
咪以為古天樂齋同阿峯合唱一首歌就走人呀！佢仲同阿峯jam埋《今期流行》，風騷輕跳拜神舞！唱完林峯勁hyper猛大叫：「我得咗！」佢哋兩個又勁入戲咁對話，阿峯笑話依家適應咗現代生活，真係笑死無命賠！
古天樂抵死笑話依家做老闆都要做埋嘉賓，甚至向阿峯提出網上4大傳聞望求證，包括：「對張櫈做愛」、「激光射爆fans鏡頭」、「長髮dancer靚仔」、「觀眾全程睇背影」，阿峯又點回應？古天樂又不忘預告「都市傳說」《尋秦記》將於元旦上映，再點名坐台下嘅「徒弟」張繼聰宣傳，阿聰笑以「香港隊長」稱呼古天樂！最後佢再唱埋《男朋友》先落台，呢part正到爆呀！
另外，嚟睇騷嘅嘉賓有「張氏夫婦」張繼聰同謝安琪、肥仔@ERROR、《城寨》動作指導谷垣健治、胡子彤、楊偲泳、kayan9896、黃浩然夫婦、胡杏兒夫婦、陳浩民夫婦等！而張家輝、陳慧琳、陳小春夫婦、MC Jin等則送上花籃賀阿峯Good Show！
