【A&M Diary】大家去露營，唔知會準備咩嘢食呢？我哋就曾經見過隔離嘅營友準備牛扒、羊架，甚至鵝肝添！但我就鍾意成班朋友喺月下打邊爐，咁先係男人的浪漫。不過，當呢班男人嘅年紀越嚟越大，又有家室兼唱著幸福之歌，仲點去露營呢！所以難得約齊腳，就一於去露營風為主題嘅圍爐取暖。同成班兄弟重拾露營打邊爐嘅樂趣，順便圍爐取暖講吓喺屋企畀老婆恰嘅坎坷故事啦！
花膠雞鍋
圍爐取暖以露營風為主題，裝飾落足心機，擺放咗好多綠色植物，營造郊外嘅效果，加上露營專用嘅枱枱凳凳，成間餐廳都巧有feel！但如果你以為露營火鍋嘅湯底就一定係辛辣麵味精湯，咁你嚟到圍爐取暖一定會好失望，因為餐廳嘅湯底係花膠雞鍋呢！湯底絕對係落足料，配料當然唔少得黃油雞同花膠啦！喺打邊爐前，大家都飲咗兩三碗花膠雞湯，夠晒滿足。
安格斯牛小排
牛小排嘅肥瘦均勻，肉味香濃，輕輕一淥就食得。
中山脆肉鯇魚片
鯇魚片非常新鮮，肉質香脆無骨。
韭菜鮮肉餃
自家製作嘅韭菜鮮肉餃，韭菜份量非常多呢！水餃皮夠晒薄，入面仲有好多肉汁，非常驚喜。
濕炸枝竹
如果火鍋嘅湯底夠正，枝竹絕對係唔可以缺少嘅食材。索晒湯汁精華嘅枝竹，真係無得輸。
黑白無常
所謂黑白無常即係墨魚丸同墨汁丸，兩款墨丸都非常彈牙，其中墨魚丸入面仲有好多墨魚粒粒，墨魚味特別香濃。
水晶粉
水晶粉煙煙韌韌，同樣係索湯掛湯之選。
油麥菜、秀珍菇、蓮藕片
蔬菜類就揀咗呢三款食材，款款都非常新鮮。平時食蓮藕片通常配麻辣湯，但又估唔到配花膠湯都一樣咁正。
