【A&M Diary】下一站：泰國！坐火車去泰國，你試過未？其實我哋都未試過，但呢間位於銅鑼灣嘅小曼谷泰國美食站，一入門口就見到架大火車，真係好似去咗火車夜市咁呀！而每晚8點仲有駐場泰國歌手表演，邊食邊聽住泰國LIVE Music，真係好chill。
串燒
串燒選擇好多，我哋就叫咗三串試吓：雞腎、雞、同埋雞全翼。雞腎好爽口、雞肉嫩滑、而雞翼就好入味！但食串燒，最重要都係個沙嗲醬，令串燒更加惹味。
風味燒豬頸肉
大大份嘅豬頸肉睇落就好抵食，原來味道都唔錯，大家記住係必點項目！豬頸肉外邊燒到好脆口，有少少焦香味，而內裡仲keep到細嫩，好juicy！
豬肉碎生菜包
份量超多，我哋2個完全係食唔晒！Order時，店員會細心詢問食唔食得辣，唔食得辣嘅你都無問題。我哋雖然叫咗辣，但其實都唔會太辣，生菜包住大量肉碎，真係好幸福呀！
泰式燒盲鰽
怕骨嘅A姐不嬲對魚都無乜大興趣，但佢就覺得呢條盲鰽相當唔錯，因為骨唔算多，而且只係用少少鹽調味，好簡單，反而食到佢嘅鮮味。
泰式鮮蝦炒金邊粉
食泰國嘢又點少得Pad Thai，份量唔少，蝦有3大隻，但就略嫌鑊氣唔夠。
