【A&M Diary】知喇，好耐無去過旅行，更加唔知幾時有得再去玩吖嘛！不如，帶你去食曼谷流水蝦，止吓旅行癮先啦！今日，同A姐嚟到位於尖沙咀諾士佛台嘅泰夯蝦，呢到主打曼谷正宗流水蝦放題，仲要食足3個鐘，真係食到笑蝦蝦（畀A姐話我好爛）！
流水大頭蝦
每張檯嘅旁邊就係蝦池，不過因為疫情期間，餐廳人數減少，而為確保流水蝦嘅新鮮，所以蝦就集中喺中間位置。大家先去蝦池捉大頭蝦，捉到嘅蝦先放入冰筒，將佢哋凍暈，然後再燒。我哋建議燒之前先剪咗啲鬚同腳，咁食嘅時候就會方便啲！大頭蝦即捉即燒，當然夠晒新鮮！雖然冇泰國嗰時食嘅咁大隻，好彩肉質都超彈牙，而蝦頭又勁多膏，真係食唔停口啊！
海鮮區
除咗蝦，呢到嘅海鮮仲有扇貝、蜆同青口，當中我哋encore推介嘅係蜆，粒粒都冇沙，脹卜卜，夠晒鮮甜！
自取燒烤區
我哋今次食午餐放題，估唔到款式都唔少！雞翼都有五款口味，仲有牛仔骨、豬頸肉、粟米、菇、丸同菜類。
