【Viu】一連12場MIRROR紅館演唱會噚晚開鑼，12子以白馬王子Look從天而降，為演唱會揭開序幕，接連跳唱3首團歌《Innerspace》、《Reflection》同《All in one》炒熱全場！頭場始終難免有沙石，除了Edan的鋼琴出問題外，最令鏡粉關心莫過於機關嘅安全，AK、姜濤同Edan分別喺高台上差錯腳，險象環生。當12子換上西裝唱《IGNITED》時，橫跨整個舞台嘅長橋仲不斷搖晃，睇到一班觀眾喊驚呀！Encore時，MIRROR同全場大合唱《蒙著嘴說愛你》同《One and All》，姜Man仲感觸落淚，好在有教主拍膊頭安慰，整個演唱會唱足3個鐘㗎！
完騷後，一班鏡仔都有「賽後檢討」，Edan話有驚無險，認為突發事件仲有趣；大表哥自評頭場演出只有55分，自覺做得唔夠好，個騷都唔夠好。姜濤就多謝每一位入場觀眾，希望大家平平安安；Jer就話明天會更好！
鏡粉兼星級蛋糕師Jimmy同Scott就大讚個騷滿分，零廁所位，最難忘Frankie剖白隱形人心聲，同埋Edan嘅執生能力。而Elaine同Candy同樣盛讚係100分演出，見到姜濤喊嗰陣，自己都忍唔住眼濕濕呀！
