【A&M Diary】位於西營盤嘅La Paloma Spanish Restaurant，以正宗西班牙風味為賣點，配上精緻擺盤，帶嚟一系列色香味俱全嘅菜式；而且餐枱上嘅鮮花，加上西班牙特色嘅佈置，連同期間限定嘅周年西班牙舞蹈表演同任飲酒精飲品，讓味蕾享受到西班牙的熱情和美味之餘，仲可以浸沉於西班牙嘅氛圍當中。
傳統西班牙奄列
薄脆嘅蛋皮包裹住軟腍嘅薯仔同埋脆口嘅洋蔥，並配以辣肉腸做配料，令口感更豐富之外，仲有陣陣嘅鹹辣香味。
牛頰肉配薯蓉佐長柄西蘭花及蘑菇
La Paloma嘅牛頰肉做得非常出色，帶有膠質嘅牛肉充滿住濃郁嘅牛味，油香豐盈，接近入口即溶化。仲可以將肉汁撈勻喺綿滑嘅薯蓉上面，味道更令人回味。
Tuna Tataki with Salmorejo and black olives
生嘅呑拿魚片加上冷湯汁salmorejo之後，酸甜嘅湯汁令呑拿魚嘅鮮味變得更突出，建議配搭上伴碟嘅多士嚟食，配合脆脆嘅口感更加滋味。
煙燻三文魚配墨西哥酸忌廉及三文魚子
店員話別名叫三文魚炸彈，係因為經過煙燻處理嘅三文魚，入口後隨住脆皮嘅爆開，整個口腔都充滿住三文魚子嘅鹹香同酸忌廉嘅微酸，非常過癮，而且餘韻甚強。
