【A&M Diary】位於大角咀嘅喜歡裡米線，顧名思義，係主打米線嘅餐廳。但菜單選擇夠晒多款，主食除咗米線，就連飯都有，而且水餃、春卷等都係自家出品，眼見老闆事事親力親為，默默喺廚房備餐之餘，仲會主動向食客詢問意見，集思廣益，而食物出品亦感覺到誠意同心意，佢嘅努力係需要被人看見！
蜆蚧鯪魚球
一碟有五粒鯪魚球，每粒都脹卜卜，即叫即炸，上到枱當然仲係熱辣辣啦！一啖咬落去鯪魚球，無骨又夠彈牙，魚肉味香濃，口感實在。
酸麻辣米線
酸、麻、辣嘅比例平衡得啱啱好，湯底香而辣唔會太嗆口，後勁嘅酸味為米線帶嚟更深層次嘅味道。酸麻辣湯底木身有芫荽、腐皮、芽菜同酸菜，而自選嘅配料就揀咗韭菜、雞絲同竹笙。最正當然係索晒湯嘅竹笙啦；至於雞肉滑溜，而且米線非常彈牙，份量十足！
沙嗲米線
一般嘅米線餐廳好少會見到沙嗲湯底，所以喺喜歡裡米線見到，真係即刻要試試。沙嗲湯底嘅味道非常香濃，加上花生碎同肉碎，增加咗味道嘅層次同口感，但最深得我喜愛嘅原因係湯底唔會太稠或太稀，令米線輕易就掛到湯。至於配菜揀咗豬大腸、滷水雞翼、素菜菌菇餃同墨魚春卷。其中素菜菌菇餃係自家製，餃夠晒大粒，而且水餃皮非常薄，絕對要試！另外，大腸洗得夠乾淨；而雞翼嘅滷水香濃入味，同樣驚喜。
