【A&M Diary】作為一個米線控，試過一日幾多餐米線呢？熱辣辣嘅湯底、麻辣酸嘅多重層次、爽口彈牙又掛湯嘅米線，加上唔同種類配料，真係諗起又想食一碗米線呢！講到米線，荃灣絕對係米線嘅大本營，其中備受追捧嘅雲米家，近排就喺葵涌開設分店，夠晒方便。
藤椒魚皮
藤椒嘅麻痺力度恰到好處，越食越開胃，而且魚皮爽脆入味，係一流嘅開胃菜，而且份量十足，夠晒抵食。
麻辣蒜泥白肉
米線店嘅小食，一向都係雞翼同蒜泥白肉分庭抗禮，你又鍾意邊款呢？雲米家嘅麻辣蒜泥白肉，肉片嘅厚薄適中，蒜泥又香又濃，每塊都充分沾上蒜泥味道，非常惹味。
串燒牛肉、串燒墨魚頭
串燒即叫即燒，牛肉燒得啱啱好，肉質鮮嫩，肉汁得以保持；墨魚頭係一口大小，爽口彈牙，配上惹味醬汁，食唔停口。
酸辣米線
酸辣米線先係雲米家嘅靈魂，呢度嘅酸辣湯底就啱晒我口味，一開始嘅湯底偏酸，後徑帶有濃郁嘅辣味，極具層次。而餸菜方面，就揀咗腩肉、豬腸、豬肚同蘿蔔：腩肉肥瘦適中，肉邊帶有小量肥膏；豬腸肥美；豬肚則彈牙爽口；而最考功夫嘅蘿蔔則清甜入味，燜得相當軟腍。
