【A&M Diary】估唔到我哋兩個，一個鍾意重口味，另一個就鍾意淡口味。所以今日就帶M佬嚟到屯門嘅順酸辣粉，沙嗲、麻辣、酸辣、鹵水，全都都係重口味嘅選擇，夠香又夠濃郁，一於調教佢個胃，享受味道嘅層次，帶味蕾登上另一境界。
鹵水拼盤
顧名思義，順酸辣粉主打當然係酸辣粉，但其實餐廳嘅鹵水亦係招牌菜。上枱嘅鹵水已經聞到嗰浸清香味，配料則有豬腸、豬肚同豬頸肉，全部都入晒味，夠晒香濃。
燒豬頸肉
另一款小食就揀咗燒豬頸肉，豬頸肉嘅外皮燒得夠香脆，仲帶有微微嘅焦香感。肉質爽口，肉汁juicy，點埋另上嘅甜酸醬，食落惹味。
麻辣湯紅薯粉
餐廳嘅酸辣當然係主角，但今日想試試麻辣。湯底除咗麻同辣之外，亦用上大量肉骨熬湯，所以更加香濃，而薯粉當然完美咁索晒湯汁啦！配料嘅牛柏葉口感爽脆、水魷彈牙、而豬大腸就最索味，真係辣得過癮。
沙嗲濃湯米線
怕辣嘅可以揀沙嗲濃湯，而順酸辣粉嘅沙嗲湯底走星馬風，有種喇沙嘅風味。配料有肥牛、滷蛋、豬膶、雞絲、腩肉、粉量十足。特別推介豬膶，新鮮粉嫩，而且完全無腥味，仲索晒湯呢！
