【A&M Diary】集團式經營嘅泰國菜，勝在就腳方便，但唔好以為集團經營就無好嘢呀！位於黃大仙嘅亞萊泰，由設計餐牌、食材入口，都係由泰國廚師主理，就連泰國總領事都係座上客，贏得口碑後，再開設其他分店，成為香港其中一間具規模嘅泰菜餐廳，當中嘅青檸明爐蒸烏頭更加係我嘅最愛。
炭燒泰式串燒（豬+雞）試晒兩款口味，豬肉、雞肉各3串。而我就鍾意豬多啲喇！口感啱啱好，唔會太乾，而豬肉味濃，仲好juicy添！點埋個沙嗲汁一齊食，就更加正！
香草鮮青檸明爐蒸烏頭
我同M佬對烏頭真係好極端，佢就好鍾意，我就超唔鍾意，因為成日都覺得烏頭肉好似好梅同好有泥味，但偏偏佢就係話咁先正！估唔到呢條烏頭都幾驚喜，肉質結實唔梅，加上湯底似冬蔭公湯味，再加上青檸同蒜頭，泥味完全消失，好啱我食呀！
泰式海南雞（半隻）
喺香港食雞邊有雞味架，唔多雪味已經合格喇！呢度雞肉好嫩滑，講真雪味就總有少少，但配埋醬油、薑蓉同酸辣醬，已經好好喇。
泰式荳醬飛天通菜
呢個絕對係食泰國菜嘅蔬菜必選，2個人夠晒食。通菜都夠新鮮同好嫩，仲好惹味！
泰式菠蘿海鮮炒飯菠蘿海鮮炒飯
嗰炒飯夠晒足料，非常惹味！仲有好多提子乾、菠蘿同雞肉，大件夾抵食!
