【A&M Diary】唔知你哋有冇玩過情侶Bingo遊戲呢？例如問題係對方鍾意咩顏色，然後一齊講個答案出嚟，睇吓答得啱唔啱，就知道有幾了解對方啦！如果講中式小菜Bingo，A姐最鍾意一定係肉餅！所以食親飯，肉餅總是常出現，咁如果成間餐廳都只係得肉餅，唔知A姐又會唔會好興奮呢！今日我哋去到元朗嘅屏山老地方，呢間舖頭超過50款肉餅選擇，A姐話連續食50日都唔會厭。
屏山老地方鄰近西鐵天水圍站或輕鐵屏山站，另外，餐廳更加提供免費泊車，方便駕駛人士。食飽飽之後，仲可以去旁邊嘅屏山文物徑開展一場歷史漫步之旅。
黑椒牛肉煎肉餅飯
餐廳嘅肉餅選擇超過50款，有啲驚喜十足，有一啲我就覺得似係伏，但對於肉餅狂迷嘅A姐就認為每一款都係充滿創意力量同幻想。佢就揀咗黑椒牛肉煎肉餅，本身以為黑椒只係淋上面嘅醬汁，估唔到係將黑椒同牛肉完美咁融入肉餅內，黑椒味香濃，煎完嘅肉餅夠厚實又Juicy，啱晒鍾意啖啖肉嘅佢。
鹹魚蓮藕煎肉餅飯
至於我就揀咗同肉餅最夾嘅鹹魚，加埋蓮藕喺入面，口感一流。而且鹹魚絕對冇得輸，鹹香味十足又冇骨，煎完之後夠香脆，估唔到我都比肉餅深深吸引住。另外，呢度嘅肉餅成隻手掌咁大，真係餸多過飯，夠晒抵食！
新疆土鄉雞翼
雞翼新鮮炸香，夠晒脆卜卜同熱辣辣，面頭鋪上大量嘅孜然粉，味道好有層次，但就略嫌孜然粉太多。
