【A&M Diary】尖沙咀嘅新港中心係我哋細個嘅蒲點，最鍾意去機舖鬥場賽車、打喪屍、玩籃球機，大個就最鍾意去新港中心搵食！新港中心嘅餐廳選擇好多，名字看似溫文爾雅嘅八月茶室，原來暗藏川辣嘅方程式！八月茶室嘅食物選擇非常多，而招牌嘅酸菜魚真係非常高質，一試難忘。
招牌酸菜魚
酸菜魚係八月茶室嘅招牌，又點可以唔叫呢！魚肉嘅肉質鮮嫩軟綿，魚肉鮮香肉甜；同為主角嘅酸菜，酸酸哋，醒胃又開胃。但講到酸菜魚嘅MVP，就一定係寬粉，Q彈嘅口感，加上寬粉吸收晒酸菜魚湯嘅精華，超入味呀！
川辣辣子雞丁
辣子雞丁係川菜嘅名物之一，麻同辣各司其職，而用辣椒炒過嘅雞件除咗色澤亮麗，非常惹味，而雞件切得大小適中，外層炸得乾身而唔會油淋淋，鎖住肉汁之餘內層雞肉肉質嫩滑。
魚香茄子飯
魚香茄子飯係我哋嘅comfort food！八月茶室嘅魚香茄子微辣，而炒到淋身嘅茄子吸收咗魚香，鹹鮮味道從後勁出現，請問可唔可以添飯呀！
