【A&M Diary】香港嘅商場各出奇謀，以吸引顧客人流：喺90年代，商場喜歡加入唔同嘅主題設計；00年代就引進唔少國際知名品牌；到今日，商場嘅餐廳選擇成為大眾焦點，除咗味道同名氣，菜式選擇都非常重要，令商場尤如成為聯合國。其中圓方就有各式各樣嘅國際菜式選擇，主打東南亞菜嘅斑蘭，價錢實惠，性價比高，出品充滿南洋風味，成為我哋嘅推介。
街頭串燒
食東南亞菜，小食又點少得串燒呢？越式香茅雞肉串嘅香茅味主導整個香味，雞肉嫩滑又入味；黑毛豬腩肉燒得焦香，逼出過多嘅油分，香而不膩！
越式牛油果醬法包配蕃茄莎莎
烘到香脆嘅法包上鋪滿牛油果醬同蕃茄莎莎，真係口感同層次嘅挑戰。牛油果醬非常香滑，非常足料重身，非常鮮甜；但加上酸酸甜甜嘅蕃茄莎莎，又可以減輕牛油果醬嘅油膩感，真係絕配。
自家製腐乳蛋黃醬單骨牛油雞翼
喜歡南洋菜，其實亦喜歡佢哋對於醬汁嘅新意。好似早幾年嘅人氣鹹蛋黃醬，而嚟到斑蘭就有自家製嘅腐乳蛋黃醬！腐乳作為常用嘅粵式醬汁，鹹香十足，而加入蛋黃醬後，令味道更平順，香滑而且非常creamy，配上啱啱炸好嘅單骨牛油雞翼，真係OMG地好味！
越式雞絲扎肉湯河
食咗幾個比較濃味嘅小食，主菜就揀咗相對清淡嘅越式雞絲扎肉湯河啦。估唔到下午菜優惠時段嘅越式雞絲扎肉湯河都份量十足，彈牙嘅扎肉有三塊而雞絲就一大堆，河粉嫩滑，值得推介。
招牌無骨海南雞配油香飯
食雞又點可以唔食皮呢！雞皮嘅油脂層完全唔厚，食嘅時候毫無罪惡感，而且啖啖肉嘅海南雞，肉質嫩滑。唔知大家食海南雞又鍾意點邊款醬汁呢？另外，食海南雞嘅焦點，又點少得油香飯呢！
桔仔話梅水、青檸梳
最後下午茶嘅套餐除咗小食同主菜之外，仲可以加上一杯南洋特色嘅飲品，我哋就揀咗滋潤嘅桔仔話梅水同清新嘅青檸梳打，真係夠晒抵食。
