【A&M Diary】蘇豪區一帶有唔少異國風情嘅餐廳選擇，提供來自各種文化嘅高檔餐廳同時尚酒吧，係香港極具特色嘅美食區。而喺中東菜、意大利菜徘徊之間，原來喺樓上仲有呢間以上海菜作主打嘅六游。對比相對較乾嘅Kebab同Pizza，好似食濃湯上海麵更加適合。六游店內面積雖然唔大，但出品用心，值得推介。
麻辣凍蜆
凍蜆粒粒肥美飽滿，以麻辣味提鮮，麻辣汁後勁十足，味道極具層次，而且蜆肉完全無沙，夠晒惹味。
焦糖蕃薯
叫咗一個冷盤小食，另一個就叫熱盤小食啦！呢個焦糖蕃薯興其叫佢做前菜，其實可能做甜品會更適合。蕃薯切到細細條，每條都比焦糖包住，外脆內軟。唯一要注意係一定要襯熱食，凍咗就容易黏埋一齊。
六游雞湯上海麵
六游上海麵嘅湯底，以雞胸肉加上豬骨熬製，湯底好清唔油而味道非常濃郁，而且麵條非常掛湯。至於配料嘅雞胸，雖然大大舊，但以慢煮方式烹調，再用火槍輕輕炙燒，所以雞胸嘅肉質一啲都唔嚡，尚算嫩滑。其他配料仲有蓮藕、雲耳，簡單嘅烹調，更能食出食材嘅鮮甜味道。
