【A&M Diary】喺大排檔食潮州打冷都真係麻甩嘅浪漫！其實潮州菜係中國南方傳統地道飲食文化，而潮州菜嚟到香港之後，亦加入唔少地道元素，而我哋就習慣叫潮州菜做打冷。食打冷唔一定要去大排檔嘅，特別係帶住A姐，坐得舒服，嘢又夠好食就最重要。今次重臨旺角嘅明記潮館，呢度嘅潮州菜味道依舊唔錯，仲有海鮮同小菜等選擇，重點係份量超多！
滷水拼盤
近期佢哋推出優惠，食滿HK$300，就會送滷水拼盤，有鵝腸、豬大腸、紅腸、豬腩肉、豬耳同墨魚，仲有大豆芽墊底，份量十足。我就最鍾意豬大腸，洗得夠乾淨，滷水味香濃。
韮菜豬紅
食打冷又點少得韮菜豬紅呢？份量超多，豬紅香滑，唔會一咬就散，韮菜味香濃，索晒湯，唔錯。
招牌煲仔焗花蛤
一打開個煲蓋，全部都係花蛤，花蛤好鮮甜，大大隻，漲卜卜，但略嫌部份有少少沙。
涼瓜排骨煲
涼瓜唔會太苦，排骨軟腍，好香嘅蒜頭豆豉味，配飯一流。
