【A&M Diary】A姐話佢每一日最享受就係食嘢嘅時間，食物嘅質素固然重要，色香味缺一不可，但餐廳嘅裝修、服務、menu嘅創意同樣重要。今日外面落住雨，我哋就喺尖沙咀K11購物藝術館閒逛嘅時候，發現呢間主打新派泰國菜嘅阿閒泰，餐廳好舒服，又坐得闊落，一於同大家推介。
幸運七式拼盤
拼盤包括有七種小食：三式串燒、泰式肉餅、雞翼、薯條同牛油果海蝦紙米卷。雞翼係單骨雞翼，燒得好入味；泰式肉餅嘅豬味香濃，好有口感；三式串燒分別係雞腎、豬肉同雞肉，雖然佢唔係配沙嗲醬，但秘製醬汁同樣好味；至於牛油果海蝦米紙卷就好有層次，唔錯。
阿閒泰手切豬腩肉豬肉丸船粉
雖然船粉本身係廉價嘅平民食物，但近年慢慢改良，由船上賣到上岸，配料食材都講究起嚟。其實船面嘅湯底係靈魂所在，每間鋪頭都有獨門配方，但主要以滷水料加入豬血做湯底，再以芫荽、玉桂、八角、香茅等唔同嘅泰式香料熬製，所以味道濃郁，好有層次。至於一層肥一層瘦嘅豬腩肉雖然好有罪惡感，但食落唔油膩。
阿閒泰慢煮厚切脆皮豬頸肉配椰香糯米飯、羽衣甘藍、蒜頭、青瓜
份量好多，最重要係呢個慢煮厚切脆皮豬頸肉真係好好好好味！豬頸肉脆皮而入邊好juicy，加埋蒜頭一齊食，味道層次大大提升！旁邊嘅羽衣甘藍同青瓜新鮮爽脆，解膩一流。
楊枝金露沙沙配自家製芒果雪條
呢個甜品，真係好滿足！雪條嘅芒果味濃郁，啖啖芒果肉；楊枝金露香滑細膩，酸甜開胃，仲有芒果爆珠添，正呀！
