0
0
〈好遊〉絕美東區打卡靚景 90分鐘登上柏架山

〈好遊〉絕美東區打卡靚景 90分鐘登上柏架山

【A&M Diary】90分鐘可以做啲咩?可以睇套戲、食dinner、玩密室……但你又有無諗過90分鐘可以行山兼登上港島第二高峰呢?香港雖然係一個已發展城市,市中心人煙稠密,仲有唔少高樓大廈,但喺我哋身邊都有唔少郊遊遠足路線,今次我就同A姐嚟到鰂魚涌嘅柏架山,沿路輕鬆易行,除咗有勁多打卡位,仲睇到港島東同九龍東嘅維港靚景,90分鐘絕對值得!

前往方法
1. 喺鰂魚涌港鐵站落車,行至海山樓旁邊嘅鰂魚涌市政大廈,就係今次路程嘅起步點
2. 柏架山道雖然係行車嘅水泥路,但除咗的士、具通行證同政府車輛外,其他車輛係唔入得,自駕遊嘅字母粉可以泊喺鰂魚涌區內停車場

提提你
1. 由起步點至終點雷達站,路程約個半鐘,全程為水泥路,唔算太辛苦,屬於初級至中級路線,記住要量力以為
2. 沿路設有3個洗手間,但沒有補給站,記住自備足夠飲品
3. 大家記住保持環境清潔,自己垃圾自己帶走,絕對唔可以破壞大自然環境

柏架山
位於港島東區嘅柏架山海拔532米,除咗係東區嘅最高峰,亦係香港島繼太平山之後嘅第二高峰。柏架山嘅郊遊路線亦屬於大潭郊野公園(鰂魚涌擴建部份)一部份。

林邊生物多樣性自然教育中心
林邊生物多樣性自然教育中心又名「紅屋」係二級歷史古蹟。前身為1922年嘅林邊屋,係太古糖廠及太古船塢歐藉職員宿舍,樓高兩層,外牆由紅磚建成,屬早期英式建築設計。1972年因為太古糖廠結束營業而被空置。曾經活化成國際文化事務協會嘅紅屋藝術展覽中心,後嚟喺2012年由漁農自然護理署接手管理,並改建為林邊生物多樣性自然教育中心。教育中心內有唔少喺叢林生活嘅動植物介紹,絕對一個適合親子參觀同學習通識嘅地方。另外,外牆嘅英式紅磚設計亦係一個A姐推介嘅打卡熱點!順帶一提,林邊生物多樣性自然教育中心內設有洗手間同提供免費斟水嘅地方,臨走前就先補給吓啦!

開放時間:星期一、星期三至星期日及公眾假期 09:30-16:30

鰂魚涌樹木研習徑
鰂魚涌樹木研習徑除咗可以了解樹木,仲有一個日戰時期嘅軍事遺蹟,係一個集歷史同大自然嘅行山路線。但因為好多人嘅目標係柏架山雷達站,而為免兜路,所以就放棄呢條鰂魚涌樹木研習徑,就繼續沿水泥路往雷達站出發。我哋就建議為免消耗體力,可以選擇回程嘅時候再作遊覽。順帶一提,呢度亦係一個交匯站,除咗鰂魚涌樹木研習徑,旁邊就係金督馳馬徑同康柏郊遊徑嘅入口。

柏架山道第一燒烤區
嚟到柏架山道第一燒烤區設有行程中第二個洗手間,而喺洗手間嘅旁邊就有一個觀景台同涼亭,各位字母粉可以喺呢度稍作休息同飽覽鰂魚涌嘅市景,而最高嘅建築物就係東區最高大廈:港島東中心(One Island East)。另外,喺燒烤區經常有野豬出沒,大家記住同野生動物共融,唔好傷害佢哋亦唔需要餵飼佢哋。

大風坳
上到嚟海拔320米嘅大風坳,就完成咗大概5份之3嘅路程,記住去埋洗手間,因為呢個係上柏架山雷達站前最後一個洗手間喇!大風坳亦係多條港島行山遠足路線嘅交匯站,除咗可以去到今次行程目的地嘅柏架山,仲可以前往其他目的地,例如:畢拿山、小馬山、港島徑、野豬徑同大潭水塘等地方。另外,字母粉記住唔好錯過大風坳嘅野餐區,呢底可以俯瞰大潭水塘嘅景色。

大雷達站
離開大風坳之後,就要由320米登上532米嘅柏架山。中途亦設有涼亭同長凳可以稍作休息,景觀就以香港東海岸一帶為主,夠晒開陽。一直行直至見到分叉路,左邊就係小雷達站,而右邊就係大雷達站,而我哋就先去大雷達站。有唔少人會叫大雷達站做大波波,呢個大波波係2004年啟用,用以探測天氣或覆蓋範圍內嘅航機距離同高度等資料,以確保航空交通安全。雷達站係閒人禁止進入嘅區域,喺門口影完相,都唔好咁快走住,大雷達站旁邊設有一條小徑,由小徑行入去,就會睇到柴灣、小西灣、東龍島同石澳全景,真係好靚呀!

小雷達站
離開大雷達站返去分叉路口,今次就往左邊行前往小雷達站,同樣地有唔少人會叫小雷達站做小波波,雖然雷達站係閒人禁止進入嘅區域,但喺門口影完相,都唔好咁快走住,因為想睇絕美東區打卡靚景就要去到小雷達站嘅秘道喇!小雷達站對面有條樓梯前往發射塔,沿住塔嘅鐵綫圍旁之小路,就會去到柏架山標高柱,呢個景可以睇到由港島北角同九龍郵輪碼頭東至將軍澳同小西灣一帶嘅香港東海岸無遮擋景色,天氣好仲可以望到無盡嘅太平洋景色。不過,呢條小路比較窄,亦唔係一條完善嘅行山路線,大家要自行承擔風險呀!

回程

  1. 更多
  1. 東鐵綫上水站有信號系統組件故障
    東鐵綫上水站有信號系統組件故障
    41分鐘前
  2. 英國將再向烏克蘭提供多5億英鎊軍援 軍費未來六年會增至佔GDP 2.5%
    英國將再向烏克蘭提供多5億英鎊軍援 軍費未來六年會增至佔GDP 2.5%
    17分鐘前
  3. 俄羅斯副國防部長伊萬諾夫涉受賄被拘
    俄羅斯副國防部長伊萬諾夫涉受賄被拘
    21分鐘前
  4. 蘋果公司預告將於下月7日舉辦特別活動
    蘋果公司預告將於下月7日舉辦特別活動
    18分鐘前
  5. 山頂纜車今日恢復服務
    山頂纜車今日恢復服務
    28分鐘前
  6. 所羅門群島大選 未有政黨取得過半議席
    所羅門群島大選 未有政黨取得過半議席
    1小時前
  7. 廣東下調防汛應急響應至三級
    廣東下調防汛應急響應至三級
    1小時前
  8. 歐洲股市向上 英國富時100指數續創新高
    歐洲股市向上 英國富時100指數續創新高
    1小時前
  9. 德國再拘一人涉向中國提供機密情報 中國駐德使館批評媒體炒作間諜威脅
    德國再拘一人涉向中國提供機密情報 中國駐德使館批評媒體炒作間諜威脅
    1小時前
  10. 《華爾街日報》記者格爾什科維奇尋求中止羈押遭拒
    《華爾街日報》記者格爾什科維奇尋求中止羈押遭拒
    1小時前