【A&M Diary】太古城雖然有唔少餐廳，但想搵間小清新cafe好似就比較少見。近期終於新開一間日系嘅文青cafe：PHI Coffee & Pancake。餐廳主打空氣梳乎厘同簡餐，鹹點同甜點都有，味道唔錯，加上坐得舒服，啱晒喺太古城shopping之後，嚟呢度休息嘆吓啦！
牛油果蟹肉牛角包
牛角包非常鬆化，配料有香熟軟綿嘅牛油果，加上絲絲嘅蟹肉，口感豐富。牛角包仲配有一隻太陽蛋，食之前可以將蛋黃叉開，撈埋蛋汁一齊食，就更加香滑！
墨汁海鮮意粉
意粉先用蒜蓉炒香，每條意粉都掛上墨汁，味道好有層次。海鮮配料就有蝦同墨魚，份量都算豐富。
13%淡雪士多啤梨朱古力梳孚厘
嚟到PHI Coffee & Pancake就梗係要試吓震騰騰嘅梳乎厘pancake啦！呢個梳孚厘pancake空氣感十足，口感鬆軟，蛋香濃郁，好味！配料除咗淡雪士多啤梨，仲有朱古力士多啤梨，滿足晒士多啤梨控嘅慾望。另外，仲有朱古力片同忌廉，整體來講唔會太甜呀。
檸檬特飲、士多啤梨梳打
飲品方面就叫咗檸檬特飲同士多啤梨梳打，兩款飲品都好清新，夠晒解渴。
