【A&M Diary】我同A姐依家日日都WFH，但佢就辛苦得多，因為佢仲要照顧我嘅三餐，好似一開完朝早嘅會，佢就要嗱嗱臨去準備午餐，有時仲要趕去買餸添。望住佢忙到氹氹轉，真係好搞笑，但又覺得自己好幸福。不過，都唔想佢太辛苦，所以今日我哋就一齊出去食lunch，再去街市拍拖買餸！嚟到灣仔嘅貓之眼，餐廳嘅裝修走和式木系風格，令我哋好好放鬆食吓蛋包飯。
咖喱豬肉+濃茄牛肉蛋包飯
貓之眼主打蛋包飯，兩邊分別淋咗唔同嘅醬汁。呢個蛋包飯一邊就係咖喱豬肉，而另一邊就係濃茄牛肉。首先，呢度嘅雞蛋用新紀元卵，蛋味香濃，炒得非常嫩滑。至於濃茄牛肉嘅茄香十足，連埋蛋包飯一齊食，真係有食蕃茄炒蛋嘅感覺（哈哈）！牛肉粒都幾多，煮得好嫩，真心好味！
咖喱豬肉+忌廉雞肉蛋包飯
至於另一碟嘅蛋包飯，一邊就揀咗咖喱豬肉，而另一邊就係忌廉雞肉。忌廉好creamy，夠晒香滑，但就略嫌雞肉嘅份量少咗啲。至於咖喱豬肉嘅咖喱味好溫和，係日本偏甜嘅咖喱，撈埋個蛋包飯一齊食，真係無得輸呀！最後，呢度嘅店員服務態度真係好好，所以絕對實至名歸成為灣仔嘅人氣食店。
