【A&M Diary】天氣凍凍哋嘅時候，我就最鍾意食水餃喇！而每次喺觀塘想食水餃，我都要由觀塘海旁嘅office行過去裕民坊，確實有啲太遠呀！好彩有同事介紹，唔係真係唔知道，原來駱駝漆大廈新開咗間食手工餃子嘅專門店：滾餃。一入到去，就見到滾餃嘅職工努力包包包，確保水餃新鮮。
餐廳嘅menu唔花巧，水餃有7隻口味，分別係：韭菜豬肉餃、香菇粟米豬肉餃、京蔥豬肉餃、香茜豬肉餃、蒜芯鮮蝦豬肉餃、芝士粟米豬肉餃、黑松露芝士豬肉餃。每款口味都可以揀水餃數量、湯餃或煎餃，雖然我今次就無食煎餃，但我眼見我同事啲煎餃係勁爆汁呀！
