【A&M Diary】香港人食自助餐，最鍾意一定係生蠔、魚生刺身同海鮮冷盤，今日嚟到位於北角歷山酒店嘅Cafe A，呢度除咗以上嘅選擇之外，我哋更推介絕不馬虎嘅中菜美食，其中勁花心思嘅松子魚就一定感受到廚師嘅功架！話晒能夠喺星級酒店歎高質中菜同魚生海鮮，呢餐自助餐話咁易就回本啦！
生蠔
生蠔即叫即開， 夠晒新鮮，size雖然唔係大大隻，但細細隻反而仲鮮甜，蠔身夠晒飽滿，海水味濃，好creamy！
魚生刺身
刺身選擇有成六款：三文魚、油甘魚、吞拿魚、甜蝦、帶子同赤貝。我哋encore必食推介就係大大粒又厚身嘅帆立貝，我哋特登叫師傅唔好切開邊，一整粒放落口，夠晒幸福感！另外，赤貝非常鮮甜，夠爽口彈牙，加上平時自助餐一向少見，所以我哋食咗好多呀！
海鮮冷盤
海鮮冷盤方面，有海螺、凍熟蝦、紐西蘭熟青口同蟹腳。特別鍾意勁多肉又鮮甜嘅長腳蟹，仲帶有淡淡嘅海水味，非常新鮮吸引。
中式冷盤
冷盤除咗沙律之外，歷山酒店Cafe A嘅冷盤夠驚喜，同平時常見到日式冷盤唔同，呢度大玩川菜風味。冷盤有麻辣豬耳、涼拌雲耳、酸薑皮蛋等等，全部都非常開胃醒胃！但最吸引我哋嘅係蒜泥白肉，蒜香味濃郁。其他選擇仲有煙挪威三文魚、涼拌木耳青瓜沙律、薯仔沙律配芥末醬、巴馬火腿伴蜜瓜、雜錦壽司及加州卷。
特級肉眼扒、香草烤羊鞍
肉類方面都有兩款選擇，可惜我哋兩個都唔食羊，但鍾意食羊嘅朋友一定好開心喇！肉眼薄切，烤到五成熟，肉汁夠晒juicy，牛味香濃。
冬菇炆花膠
每人限定一碟，冬菇同花膠都厚身夠入味。花膠勁厚，又夠膠口，相信骨膠原夠豐富，我就決定唔切開，成舊放入口，呢種就係幸福嘅味道。
熱盤
平時食自助餐，熱盤絕對會被遺忘，但歷山酒店Cafe A嘅自助餐熱盤就絕對唔可以錯過喇！呢度嘅熱盤不定期更新，但代表作松子脆海鮮就係呢度嘅鎮店之寶，推出咗一段時間，仍然大受歡迎。松子魚非常考功夫，廚師嘅功力少啲都唔得。原條松子魚炸到非常生動，非常香口，魚肉嫩滑，加上酸甜醬汁，非常開胃！
另外，encore推介仲有金銀蒜蒸扇貝，蒜蓉味香濃，蒜貝大大粒入晒味，每次一出就瞬間沽清，好彩不斷推出，可以無間任食呀！
其他推介仲有脆皮蛋黃蝦、玫瑰豉油雞、荔蓉炸帶子、海鮑片扒小棠菜、碧綠炒蝦仁、碧綠花枝片、薑蔥生蠔，款式非常多，夠晒豐富。
食到咁上下，仲有鵝肝推出，可惜我哋已經好飽喇！後尾先知道，原來自助餐食到10點，餐廳喺用餐時段會keep住更新款式，勁有誠意，所以大家記住留肚，計劃好食自助餐嘅策略呀！
除咗中式熱盤，今日仲有唔少西式、泰式等多國菜式熱盤選擇，包括：素春卷、照燒多春魚、紅酒燴牛尾、秘製豬肋骨、蜂蜜焗薯配芝士、煙火腿意粉、香煎左口魚配龍蝦汁、香煎三文魚配紅花汁、泰式豬頸肉。
甜品
今日嘅中式甜品有紫米露，除此之外仲有多款甜品、蛋糕、水果。
首先，水果有西瓜、蜜瓜、火龍果、橙。至於甜品方面，有紫薯忌廉蛋糕、士多啤梨慕絲杯、泡芙、曲奇芝士蛋糕、黑森林蛋糕、藍莓芝士餅同芒果拿破崙，蛋糕由酒店嘅餅店師傅每日新鮮製作，有信心保證，非常好味！另外仲有香芒布甸、啫喱杯同即叫即做嘅班戟同窩夫。至於雪糕就係Häagen-Dazs，味道有成六款，分別係芒果、藍梅、曲奇、比利時朱古力、雲呢拿同士多啤梨。好彩甜品係第二個胃，又可以啟動喇！
