【A&M Diary】新鮮嘅海鮮最啱就梗係蒸啦，蒸嘅海鮮非常鮮甜，而且夠晒原汁原味！但如果咁就叫滿足，少年未免太年輕喇！因為海鮮配上粥底火鍋，就完美吸收晒海鮮嘅精華。今日我哋就嚟到銅鑼灣嘅緣味小聚，嘆呢個霸氣阿拉斯加長腳蟹刁鑽海鮮蒸氣鍋，我哋由蒸海鮮，到打邊爐，最後以粥底作結，夠晒豐富呀！
阿拉斯加長腳蟹
呢個海鮮套餐主打嘅阿拉斯加長腳蟹，絕對唔會令你失望！蟹肉厚實鮮甜，勁多蟹膏，非常甘香！
印尼厚肉琵琶蝦、韓國活大鮑魚
琵琶蝦嘅外表雖然奇怪，但肉質非常鮮甜，淡而柔軟，並且有一種特殊誘人嘅鮮味。至於鮑魚大大隻，鮮甜彈牙，好厚肉！就算唔知蒸幾耐亦唔駛擔心，因為店員會幫你較定時間，讓你品賞最高質嘅食材。
蘇格蘭蟶子皇
蟶子皇長過手指呀！蟶子鮮甜無沙，新鮮好味！
爽甜番薯大蜆、花螺、花甲
份量唔算太多，但大蜆同花甲確實非常鮮甜，肉身漲卜卜，爆多汁！
花竹蝦
花竹蝦嘅蝦肉非常彈牙，蝦頭仲有好多膏添！
澳洲M5和牛
食完海鮮，就要試吓肉啦！澳洲M5和牛嘅油脂分布平均，肉味香濃。
