【A&M Diary】A姐近期見到有唔少傳媒行家都推介呢間位於慈雲山嘅榮記茶餐室，佢哋主打首創嘅煲仔沙嗲牛肉麵，真係隔住螢光幕都聞到濃香嘅沙嗲味呀，一於去試試啦！不過，多人介紹係唔係就一定好食呢？
我哋星期日嚟到，加上受多間傳媒推介，所以都預咗舖頭會大排長龍，店長更安排唔少熟客打尖，所以我哋都等咗唔少時間。終於到我哋入座喇，喺疫情期間，店員都嚴格遵守探熱呢個指定動作，不過，舖頭面積唔大，食客坐得好迫，加上搭枱亦無分隔板，確實唔太理想。
煲仔沙嗲牛肉出前一丁
一打開煲蓋，確實有一陣濃香嘅沙嗲味，但啲傳媒報導話肉眼就見到花生粒，就未免太誇張喇，我只係見到滾湯嘅 "卜、卜、卜" 同牛肉咋！另外，店員提醒要等1至2分鐘，等啲麵浸吓熱湯先熟。終於食得喇！沙嗲味真係好濃，仲好鹹添，加上煲仔確實太熱，所以水份蒸發得好快，令湯越食越少，變成煲仔沙嗲牛肉「撈」出前一丁，而且越食越鹹同越食越「杰」。唯一欣賞係牛肉真係好嫩滑。
