【A&M Diary】要數香港最靚嘅地方，又點少得維多利亞港呢？想欣賞維港靚景，除咗上山頂同去尖東海旁之外，喺灣仔嘅全新海濱長廊終於開放喇！呢條海濱長廊由會展新翼連接至灣仔碼頭同灣仔北臨時交通交匯處，依家仲有打卡一流嘅Chocolate Rain卡通主題佈置同期間限定嘅「粉紅通道」，仲好適合大家一邊做運動，一邊欣賞維港嘅景致！
灣仔海濱長廊
全長約 1 公里，除咗適合大家散步同做運動之外，灣仔海濱長廊嘅另一用途係水上運動及康樂主題區，沿海部分欄桿可以喺活動期間拆卸，方便船隻同活動人仕上落。
維港海濱長廊
全程接近6公里，分為11段
1.中西區海濱長廊（西環副食品市場段）
2.豐物道海濱用地（又名捐山窿公園）
3.中山紀念公園
4.中山紀念公園前海濱長廊
5.中環碼頭海濱
6.香港摩天輪
7.中西區海濱長廊（中環段）
8.添馬公園
9.灣仔臨時海濱花園
10.慶典主題區（金紫荊廣場）
11.灣仔北水上運動主題區海濱長廊西段
所以大家可以繞經金紫荊廣場，連接維港海濱長廊其他路段至中西區海濱長廊，欣賞維港兩岸嘅景色，夜晚仲可以睇到夜景同期間限定嘅煙花同幻彩詠香江。
Chocolate Rain卡通主題
由本地插畫師麥雅端設計咗一系列嘅Chocolate Rain巨型畫作，喺地上面嘅畫作全部都有互動成份，啱晒小朋友喺度放電啦！另外，夜晚嚟到除咗有維港夜景之外，仲有投影燈光效果添！另外，旁邊嘅多功能活動場地仍未開放，所以喺圍板外亦有唔少充滿香港特色嘅Chocolate Rain壁畫同立體公仔，而整個長廊仲有更多裝飾設施繼續發展，希望下次嚟又會有新鮮感啦！
粉紅通道
呢條啱晒少女心打卡嘅粉紅隧道係期間限定㗎，為期半年，想去打卡嘅就要把握時間喇！
