【A&M Diary】新娘潭最出名嘅就係靈異事件，我哋都有一個同你分享：話說今日M佬帶我嚟到新娘潭，但我哋行嚟行去都搵唔到新娘潭瀑布，只係搵到照鏡潭瀑布！我哋有試過問中途遇見嘅行山友，但佢哋都話呢度得照鏡潭瀑布（好驚呀）！雖然我哋最後去唔到新娘潭瀑布，但好彩照鏡潭瀑布又幾靚喎！
前往方法
1. 喺大埔墟港鐵站外嘅小巴總站，乘坐20R綠色專線小巴到新娘潭站，惟班次疏落，約每小時一班，可參閱時間表
2. 喺大埔墟港鐵站外嘅巴士總站，乘坐275R九巴到新娘潭站，服務時間只限星期日同公眾假期，10-20分鐘一班車
3. 我哋就選擇自駕遊，車可以停新娘潭外嘅停車場，不過車位唔多，先到先得
提提你
1. 路程約15分鐘，上落波幅唔大，適合初級行山人士，但都要量力以為。沿路無洗手間同士多補給站，大家記住自備所需用品。
2. 大家記住保持環境清潔，自己垃圾自己帶走，絕對唔可以破壞大自然環境。
新娘潭自然教育徑
屬於船灣郊野公園一部份，今次我哋所行嘅新娘潭自然教育徑簡單易行，適合行山初哥，亦係一家大細假日郊遊嘅好去處，沿途風景都幾靚㗎！
落車後，沿路行15分鐘，路上都有照鏡潭指示。
照鏡潭瀑布
傳說話死去新娘喺呢個潭照鏡，所以命名為「照鏡潭」。一般人去瀑布都會選擇雨水較多嘅夏天，但我哋覺得夏天實在太熱，所以選擇秋冬時份，估唔到水流都唔少，影相好靚。
