【A&M Diary】無得同A姐去日本慶祝生日，都要同佢搞啲小心思嘅。今次我就揀咗雅高酒店集團 Accor 旗下位於灣仔嘅香港諾富特世紀酒店Novotel Century Hong Kong，同A姐玩吓Staycation。房間除咗提供浴衣以增加日本feel之外，嚟到酒店嘅全日餐廳 Le Cafe食自助晚餐，主題係「尋和味」 日式海鮮自助晚餐，主打和牛、刺身同生蠔等，勁易回本呀！
極尚和牛五食
今次自助餐主打「尋和味」嘅日式主題，所以又點少得和牛呢？呢個極尚和牛五食包括：日式壽喜燒、慢煮醬燒和牛肩胛肉眼、炸吉列和牛、和牛串燒同日式鴨肝和牛炒烏冬。
慢煮醬燒和牛肩胛肉眼
和牛厚切，肥瘦分明，肉質鮮嫩，加埋醬燒，夠晒入味。
和牛串燒
牛肉味香濃，燒到大概7成熟，鎖住肉汁，好juicy。
日式壽喜燒
壽喜燒嘅味道啱啱好，又唔會太甜，而和牛切成薄片，接近入口即溶！另外，我不嬲食壽喜燒都最鍾意佢個烏冬，索晒壽喜燒同牛肉嘅精華，好好味。
刺身
講到和食，又點少得刺身呢？刺身有油甘魚、吞拿魚、三文魚同紅蝦，我哋樣樣都叫咗啲，最鍾意係厚切嘅三文魚，好肥美，油脂豐富；而紅蝦成隻手掌咁大隻，超彈牙又多膏！但講到回本之最，又點少得鱆紅魚刺身呢？魚肉鮮甜彈牙，口感一流。
生蠔
生蠔即叫即開，以確保新鮮。生蠔算肥美，海水味濃，加少少檸檬汁吊一吊味，就夠喇。
凍海鮮盤
除咗生蠔，回本位又點少得海鮮盤呢？呢度提供長腳蟹、黑青口、螺同蝦，鮮味十足。我就最鍾意長腳蟹，蟹味香濃又勁多肉！另外，凍蝦鮮甜又彈牙呀！
日式熟食
除咗海鮮同和牛，仲有唔少日式美食，好似係天婦羅、茶碗蒸、關東煮、拉麵等等，關東煮除咗有獅子狗同鳴門卷，仲有關東煮嘅靈魂：大根！大根好入味，又鮮甜，非常好味！
