【A&M Diary】值得我哋一再encore嘅打邊爐放題，就係呢間位於旺角嘅一鍋堂！由你一出lift門嗰吓，你已經可以從佢嘅人流感受到呢間火鍋放題店嘅人氣，因為佢嘅CP值真係超高，所以想食嘅就記住提早book枱喇！
由門口進入餐飲區，成排雪柜放滿蔬菜、飲品同甜品，其中有4款自家製嘅飲品就夠晒健康，首推冰糖燉檸檬，唔太甜又開胃。
至於其他火鍋配料就用QR code落單，上菜速度好快，絕無漏單，但建議唔好一次過落太多，因為真係無位放。
鴛鴦鍋
呢度嘅湯底選擇超過10款，貪心嘅我哋就揀咗鴛鴦鍋，一邊係一鍋潮汕鍋，而另一邊就係沙嗲鍋。一鍋潮汕鍋有鹹酸菜、豆卜同冬菇，帶有濃香嘅黑胡椒味；而沙嗲鍋比出面一般嘅沙嗲湯底更香，配上肉類就啱晒。
美國安格斯牛小排
美國安格斯牛小排係encore又encore之選，油脂分佈平均，接近入口即熔。
封門柳
封門柳嘅油份相對無咁高，但就勝在肉味香濃。
牛脷心托
薄薄嘅牛脷，輕輕淥一淥就食得，口感豐富，係必叫項目。
西班牙栗飼豬肉
除咗牛肉，豬肉都唔錯㗎，西班牙栗飼豬肉嘅肉味好香，夠晒新鮮。
大蝦
除咗肉類，海鮮都超級新鮮！大蝦爽口彈牙，真係無限encore之選！
白沙蜆 + 蜆
上枱時，啲蜆仲郁緊，新鮮之餘，仲要無沙。
脆肉鯇 + 花膠 + 魚皮餃 + 雲吞 + 芫茜餃+ 鮮蝦雲吞
脆肉鯇肉質鮮甜結實，無骨啖啖肉。花膠好滑，索晒湯嘅精華，骨膠原豐富。呢度嘅餃都係自家製，材料豐富，有別於出面嘅口感，而且選擇超多，十分唔錯。
除咗以上嘅推介，其實仲有美國安格斯特選牛板腱、紐西蘭羊捲肉、手打蝦滑、釀老友鬼鬼等等，真係要帶多個胃嚟先食得晒！
