【A&M Diary】講起港式食物，又點少得鐵板餐呢？仲記得我細細個住銅鑼灣嘅時候，M爸同M媽都會帶我去灣仔波士頓餐廳鋸扒，佢哋仲話以前拍拖都會嚟呢度食飯，好多甜蜜回憶。今日我就帶A姐嚟到波士頓餐廳重溫我兒時嘅味道。
羅宋湯配牛油餐包
我哋order咗一人一份鐵板餐，跟餐就配上餐湯同牛油餐包。餐包熱辣辣，加上熔化咗牛油，麵包夠晒香！而餐湯嘅選擇有南瓜忌廉湯或羅宋湯，我哋都揀咗羅宋湯，驚喜好多什菜，微辣，好好味。
火焰牛柳鐵板餐
A姐就叫咗呢度嘅招牌菜：火焰牛柳。上枱前，店員將掛在鐡棒上嘅牛柳，直接用火燒，燒到表面微燶，再放上鐵板！所以食落嘅時候帶有少少焦香味。A姐話佢好鍾意牛柳，因為夠晒軟腍，而佢特登叫咗3成熟，借助鐵板燒到5成熟，熟度啱啱好！而跟餐仲有薯角、蔬菜同意粉（或飯），份量夠晒多！
