【Now.com生活】以為見完工就打完大佬？少年你太年輕啦！等通知先係最難捱嘅階段，總會等到囉囉攣。今次就解答大家有關Offer嘅疑問啦！
1/ 見完工隔幾耐先收到offer？
一般求職者會於見工後兩、三星期收到offer。但對管理層級嘅高職位而言，有可能要等兩至三個月先有通知。
2/應該打電話追offer嗎？
可以先選擇Email畀僱主，或者直接打電話查詢。相比下，打電話更顯誠意。不過打電話個時機好重要，唔可以太急又或拖太耐，建議大約見工後一個星期打去問吓進度。
3/ 應該點樣開口問？
要問得有禮貌，避免太過直接。
Do’s：「唔知你哋請人嘅進度去到邊個階段呢？」/「唔知你哋覺得我適唔適合呢？」
Dont’s :「我有無offer呀？」/「你地請唔請我呀？」
4/如果有幾個offer，除咗人工，仲有咩考慮因素？
人工固然重要，但同老闆、同事夾唔夾都好緊要！一般可以從面試觀察、感覺吓大家啱唔啱傾。另外，可以從實際考慮，衡量晉升空間、公司行業發展前景。
5/ 點樣拒絕offer？
如果你手上有多個offer，想放棄手上某啲offer，首要係泊好碼頭，保障自己！最好有心儀公司確認取錄嘅電郵或合約，先好拒絕其他offer！
至於拒絕offer，應盡快打去通知人，咁做會比較人性化、顯得你有交帶，仲可能留到好印象畀人！如果被問到拒絕原因，盡量可以答得大方得體，例如「另一份工有新嘗試」、「對方公司個待遇比較吸引」等等，最忌咩都唔講就走咗去！
鳴謝： 華德士商業服務部高級經理 莊志恆 Kelvin Chong
拍攝、剪接：KW
撰文：陸永東
