【now.com生活】令人又愛又恨嘅冬天終於到喇，除咗皮膚乾到龜裂，頭髮都開始毛躁打結。Now生活教室今次繼續有髮型師Ivan教我哋吹頭梳頭嘅護髮基本功，呢個冬天就唔怕做鋼線頭啦！
一）吹頭由髮根開始
照顧好頭髮鱗片先會有好髮質，好多人都唔注意吹頭呢個步驟，但其實好重要㗎。Ivan話吹頭應該由上而下，由髮根吹到髮尾，先可以修復鱗狀表層，令頭髮更加順滑。
二）逐少梳理打結頭髮
好多女仔都會遇到髮尾打結嘅問題。髮尾打結時千祈唔好喺髮根開始梳，因為頭髮只會卡住把梳而解唔到結，逐少一撮撮梳先可以減少頭髮嘅拉扯。
三) 靜電毛躁用髮尾油
髮尾油濕頭搽可以更加均勻沾上髮絲，先倒約5蚊銀大小嘅髮尾油喺手上捽勻，配合手勢按摩令頭髮吸收。咁點樣揀髮尾油呢？香港天氣唔算好乾，輕身嘅髮尾油就啱晒喇。
四）朝早趕時間吹順表層頭髮
瞓覺嘅時候，頭髮會不停同枕頭磨擦，令毛躁情況更加嚴重。如果一朝早無時間搞咁多嘢，吹順表層頭髮已經可以大大改善問題，整齊好多㗎！
特別鳴謝：Ivan Kwok
場地鳴謝：Aim Hair Studio
