【now.com】今時今日，要搵娛樂，簡直易過借火，選擇多籮籮，唔似得以前，出街搭車，只能靠雜誌同書本打發時間。𠵱家行入地鐵車廂，幾乎每個人揸住手機篤篤篤，可能瀏覽Facebook資訊，可能煲緊劇，可能打緊機，可能玩緊溝女App，揀緊邊個女仔嘅Profile Picture最吸引，然後Say句hi，滿懷歡喜等覆等hihi，偏偏唔覺有人揸住本書。
書本，彷彿只有學校上堂時先會見到，對於出嚟做嘢嘅成年人來講，直頭係上世紀嘅產物，同留聲機冇分別。
寫書嘅人，花咗一段長時間雕琢文字，思考內容，研究布局，結果唔好話一書成名，賣到洛陽紙貴，就算跪地求人睇，希望別人從文字中發現丁點兒才華或者感受到兩毫子溫暖，亦未必得。
記得以前，寫文章嘅人總係備受尊重，就算寫得唔係特別好，總之肯努力，其他人亦會投以佩服嘅眼光。而家，人哋知你寫書，都會投以佩服嘅眼光，不過係佩服你明知不可為而為之，明知今時今日冇人睇書都仲肯寫。
我喺大學，是讀中文系畢業的。系內有唔少文青，課餘時間就喺圖書館借一大堆書返Hall睇，可惜出來社會做事後，大部分都以工作攰到hihi為由，將書本拒諸門外，返到屋企，開著電視嘻嘻哈哈跟住瞓覺，你問佢睇咗啲乜，佢都未必記得。即使曾經愛中文嘅人，都敵不過現實，更何況從未喜歡過呢樣嘢嘅人？
雖然現實如此，但我堅持書本同作家仍然有價值，所以縱使寫得很爛，仍然默默寫下去。情形如同心裡明白大部分女孩唔重視暖男，但我覺得喺別人唔掂嘅時候發放溫暖是好的，就繼續做一個暖男，即使有可能不被心儀對象重視，做一世處男。
獨的格言︰以潮流為標準揀嘢學嘅人最笨，因為學有所成之日，潮流已經很流。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
