【now.com】機緣巧合下，有幸出席《X Japan的死與生》嘅優先場。X Japan對香港嘅年輕人嚟講，可能有啲陌生，又或者純粹聽過名，未聽過歌，但對我呢啲三張嘢嘅中佬而言，X Japan真的很親很重要。
雖然我認識呢隊搖滾樂隊時，佢哋經已解散，結他手Hide亦因自殺（若果說是自殺，不如說是意外較合適），被發現陳屍喺屋企洗手間，不過讀大學時，聽完佢哋嘅歌，我仍然迷上了。
記得第一首聽嘅X Japan嘅歌係《Forever Love》，原因係細個唔記得喺邊套動畫聽過，特登搵返回味。《Forever Love》，我至今聽咗過百次，初時愛的是主音Toshi嘅聲音，但後來卻被Hide嘅結他Solo吸引，佢嘅結他技術唔止高，彈出嘅音樂更有一種震撼心靈嘅感覺，簡單一句，就係聽完想喊。或者因為咁，每逢聽X Japan嘅歌，《Say Anything》、《Tears》、《Endless Rain》等等等等，我都會細心品嚐Hide嘅Solo，可惜，佢仙遊咗之後，X Japan嘅新歌亦少咗呢種享受。
如果你係X Japan迷，一定清楚知道佢哋1998年初突然解散，係因為主音Toshi忽然宣布退出。喺Toshi未出自傳《洗腦》解話前，大部分歌迷完全唔明點解佢唔再唱，有啲甚至以為佢同團長Yoshiki反目，非走不可，每次見親佢都會大吵大鬧，令一個受幾千萬人愛戴嘅主音，一夜之間變成樂迷公敵。後來才知道，原來Toshi離開，係因為邪教洗腦，而將佢帶入邪教嘅，竟然係Toshi曾經最愛嘅女人守谷香。可惜，守谷香同佢結婚，其實只係想將佢拉入邪教，呃佢啲錢，仲要佢參與治療系宗教Home of Heart嘅活動，活動內容表面係唱吓歌宣揚吓愛，事實係男人日日俾人打鑊甘，女人同教主上床等等。
被最愛出賣，以致一無所有，相信Toshi比任何人更難受，但佢冇選擇死，只係改名為Toshl，意味住一種重新。
或者你覺得X Japan離經叛道，裡面嘅團員唔值得學習，但細心一想，佢哋對音樂嘅想法，其實從來冇因為世界變遷而動搖。當日本人仍然鍾情演歌嘅時候，佢哋已經著Rock衫，個頭Gel到九樓高咁演唱搖滾歌曲。直至今日，大家鍾意K Pop，佢哋依然堅守自我，創作屬於X Japan嘅音樂，《Born To Be Free》就係最佳例子。佢哋咁做，並唔係頑固，亦唔係食老本，而係堅信自己對「最好音樂」嘅標準同睇法，認為自己可以創造潮流，而唔係被潮流帶住走，結果，佢哋做到了。
獨的格言︰只取心中「最好」。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
