【now.com】如果硬要將人分為早熟遲熟，我應該算早熟嗰堆。記得第一次鍾意異性，係小學二年班，除非你幼稚園就察覺愛情存在，唔係嘅話，恐怕幾難早過我。
小學一二年班，我次次考第二，呢點同我追女仔幾似，無論點努力，亦冇法坐正，而四次考試嘅第一名，都係同一個女仔，係一個靚女。唔知係咪我天生對靚女有本能反應，唔使一陣，我已經陷入迷戀狀態。
當時年紀小，膽卻大，一次小息，趁大家去咗操場玩，我將一張寫咗自己名同電話嘅字條，塞入佢櫃筒。「第一名」返咗位，收到字條，將佢摺埋放入筆袋。自此，我日日放學，都會跑返屋企等佢打嚟，可惜佢冇咁做。正當我失望至極，想放棄之際，有日竟然發現櫃筒有張字條，上面寫咗「第一名」嘅名字同電話。原來佢對我有Feel！原來我哋天生一對！一張字條，令我開心咗一日，我果然很有FF天分，注定做個創作人，創造從來冇發生過任何嘢嘅情緣……
嗰日回家，我左思右盼，望住字條上面嘅電話號碼，唔知打定唔打好。唔，我嗰陣的確認為「第一名」收到字條後，反應同我一樣，為打唔打畀我苦惱。我係男仔！我要勇敢行一步！基於呢個有啲「大男人主義」嘅想法，我打出咗呢個電話，而「第一名」亦有聽呢個電話。
「喂。」
佢把聲好好聽，好似陳松齡，松松姐姐講嘢咁，嘻嘻。
「喂？」
跟住，對話就結束咗。
點解？冇錯，你估得啱，以上兩句「喂」，其實出自同一個人把口，就係「第一名」把口，而我呢個「第二名」，因為過分緊張，導致肌肉硬化，開不了口。之後，我有再次嘗試打畀佢，但每次佢一開聲，我吐出嘅，就只有空氣，換來嘅，亦係冷漠嘅收線聲。
我嘅小二情緣，就係咁樣無聲結束。直至近幾年，Facebook流行，幾個熱心同學搞群組，令我有機會再見佢。佢依然咁優雅，大個女咗，我差啲忍唔住喺Facebook同佢講︰「咁大個女嗱？畀叔叔抱下先。」當然，我冇咁變態，只係Add咗佢，傾下舊事。
期間，「第一名」講咗句咁嘅說話︰「我記得你！你當年成日打嚟唔出聲！玩電話！」
原來佢一早估到電話嘅另一端係我。
我想答佢︰「其實我唔出聲，唔係玩電話，而係對住你，太緊張。」
但我冇咁做，時代雖在變易，可惜我膽小性格始終如一。
「冇呀……」
冇了。
獨的格言︰人在做，女在看。咪以為女仔唔知你對佢嗒糖。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場。
