【now.com生活】有段時間，我因為長期不受女生歡迎，所以刻意鑽研一下星相命理，睇吓係咪條命出咗咩事，不利桃花，結果原因搵唔到，亦改唔到運，但就對一句人所共知嘅道理有更深嘅體會，嗰樣嘢叫「生有時，死有時；栽種有時，拔出栽種的也有時。」結論係︰溝女有時。
我係相信命同因果嘅人，有啲因果，當下係唔知點解，等如我未成為專家Dickson之前，都唔會知道情場22戰22負，原來可以令我擔任幕前工作，做一個毒男角色，為毒男發聲。有時我諗，如若22戰裡面，有一次成功，拍到拖，或者今日嘅我就唔會以呢個模式生活落去。
如果22戰有一次成功，話唔定我𠵱家可能同「佢」結咗婚，以我頗為鹹濕嘅性格，可能有幾個仔女都未定。不過，事實並冇按照呢個劇本發生，而係走向另一條路，叫做曾經喺鏡頭前面走嚟走去，變成「演戲有時，跳舞有時，登台有時。」當中最重要嘅，就係因此出到我人生嘅第一本著作《愛情的二十二道陰影》，實踐咗理想，亦有幸喺Now呢個平台寫咗接近1年專欄，寫作有時。
每個人喺唔同嘅時間，都有一啲佢要做嘅嘢，事業未有契機，可能係上天想你攞啲時間去進修，又或者畀你去追女仔。愛情未有契機，可能係上天想你專注事業。最重要係明白時機未到，切勿胡亂發力；時機到，唔好做淆底縮縮。我仍然喺度等緊一個時機，一個與夢中情人相遇、相識、相親嘅時機。
最後要講嘅係，今期係我喺Now嘅最後一期專欄，首先多謝編輯們嘅體諒同照顧，經常被逼睇一個唔靚仔嘅人發牢騷，唔係容易嘅事。另外，再一次多謝欣賞我文字嘅你你你同你。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
