【now.com生活】同人傾偈嘅時候，偶爾都會被問到過去嘅馬經生活究竟係點。無論喜歡賭馬嘅人，還是唔喜歡賭馬嘅人，都會對馬經工作充滿好奇心，根據觀察，佢哋通常會有以下兩種幻想。
1. 同事全部係阿叔。
2. 有必勝內幕貼士。
對於幻想一，一半啱一半錯，的而且確，我當年做嗰間馬經的確係全男班，不過又未至於全部係阿叔，就以我阿頭為例，稱之為靚仔都不為過，而且馬圈中亦有女行家，當然，大家平時睇賽馬節目見到嗰啲靚女馬評家，絕對唔會喺報館出現，因為佢哋係主播，唔係編輯及記者，就算有交收，都係每日追下稿而已。
至於幻想二，更加唔使諗都知係錯。以前教我寫馬經嘅師父有句格言，就係「有中梗，我唔使喺度做啦。」而呢句說話，通常係賽後馬迷輸咗打嚟報館嘈，問匹貼士馬跑咗去邊嘅時候，就會出現，後來更成為我哋編輯部聽投訴電話嘅罐頭答案之一。其實，如果做馬經真係有必中內幕貼士，恐怕聰明人無所不用其極都要投身呢行，中舖勁嘅。
可惜，我想講嘅係，我人生最窮嘅時候，就係做馬經嘅時候（希望唔好低處未算低）。試過戶口得返100蚊，撞正公司拖糧，同事見我咁陰公，借多100蚊畀我捱日子。嗰段時間，我同另一位同事兩個人食一盒30蚊嘅飯，每日連埋搭車，只限自己用50蚊，先可以捱過低人工嘅日子。
不過，當時嘅日子雖然窮，卻係快樂嘅。同事之間冇咩爭，互相幫忙快手快腳搞掂啲嘢，工作亦冇咩要諗，可能少少嘢，例如公司過節請食飯，同事中咗馬請食Tea，已經好開心，有種患難兄弟嘅味道。有時我都會諗，若然他朝厭倦咗拚搏嘅生活，返去做馬經養老都不失為一個好選擇。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
