【now.com生活】早前訪問一個女藝人，佢提起「愛情未必一定要喺埋一齊」，我反覆思量，最後忍唔住講︰「如果你係一個男仔，恐怕你會做兵，因為我從你啱啱嘅講法，推斷到你有一種兵性。我自己非常崇尚兵性，甚至覺得兵性係好嘢嚟，但用得唔好，可能有害。」
從過往嘅經驗所得，「兵性」的確係崇高嘅愛情人格，有「兵性」嘅人，會為自己心儀對象諗得周詳，諗得很遠。早幾年做馬經，我遇到鍾意嘅人唔敢追，就係因為心中嘅「兵性」經常提我︰「Dickson，你咩新鮮蘿蔔皮？連夜晚食個廿幾蚊嘅飯盒，都要同同事Share，學咩人追女仔？唔好累人喇。」結果浪費咗幾年光陰，錯過咗幾段緣份。
後來先發現，好女仔自然多人追，而眾追求者中，必定有條件比我好嘅，若然每次都諗「嫁佢應該比嫁自己幸福」，恐怕會無伴終老孤獨一生。愛人好，自己唔好，情操高尚，但未必得到最好結局。其實，世事往往唔應該諗得咁死，或者個女仔現時跟佢幸福過跟你，不過，若然你追到佢後，發奮圖強，他朝一日係點，或唔定跟你好過跟佢。
「為女死，為女亡，為女發奮換大床」都係一種「兵性」，卻係一種正能量嘅「兵性」，起碼願意為咗同對方一齊，改變自己嘅惡習及惡運。我有個朋友，中五會考時得幾分，出嚟做咗幾年嘢，識咗個女朋友，先發覺自己生活不堪入目，結果返去讀書，𠵱家畢業搵到好工，故此，適當正面嘅「兵性」係對人有益，但若果未追先放棄，呢種「兵性」，可能就會成為一世嘅遺憾。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
