【now.com】喺毛記電視做咗咁耐，好少認真喺公眾平台講起電視劇，其中一個原因，係呢幾年都冇咩電視劇值得提起，數到上一部會追的電視劇，已經係戚其義監製嘅《心戰》，但相比起韋家輝時代嘅電視劇，又好似少咗一啲嘢。
對好多90後嘅朋友嚟講，韋家輝係一個電影導演，其實，佢曾經係電視劇嘅監製，拍過無數驚天地泣鬼神嘅劇集，包括大台嘅《義不容情》、《馬場大亨》、《大時代》等等，但係最令我獲益良多嘅一套，其實係亞視播嘅《世紀之戰》。
《世紀之戰》係《大時代》嘅續集，但風格同《大時代》完全唔同，簡單嚟講，《大時代》殘酷，《世紀之戰》卻有一種慈悲。《大時代》講嘅，係一個全民皆股、黑社會橫行、是非黑白顛倒、各家自掃門前雪嘅瘋狂社會現象，《世紀之戰》講嘅，卻係因果、解怨、改變命運等宗教思想。所以，真正嘅神劇，應該係《世紀之戰》。
無論《大時代》定《世紀之戰》，最搶鏡角色，都係鄭少秋飾演嘅丁蟹（《世紀之戰》叫丁野）。睇完《大時代》，你會覺得丁蟹係個大壞蛋，因為佢壞事做盡，打死劉松仁飾演嘅方進新，四個仔又燒死方展博一家，然後仲覺得自己啱，人哋錯。不過睇埋《世紀之戰》，你又會開始同情呢個角色，因為佢之前做壞事，其實純粹以為自己做好事，惡出於無明。當佢明白自己一直以來所做都係錯嘅時候，懊惱到癲咗，然後不斷同心魔抗爭，彌補自己嘅過錯。你又開始覺得，心寬了一點。
做人最難嘅，可能就係接受「人哋啱，自己錯」，尤其係大是大非嗰陣，雖然我經常將愛情上嘅22道陰影掛喺口唇邊，但講真，我又點會唔明白，呢22道陰影，我係有份做成？或者有日，我明白到自己嘅錯，悟咗道，就會獲得一次真正嘅成功。
獨的格言︰究竟我錯喺邊？我嘅錯，咪就係唔知自己錯喺邊⋯⋯
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場。
