【now.com】一個人對愛情嘅態度，以及佢嘅人生觀，或多或少會受到一啲「情感催化劑」嘅影響。嗱，唔好誤會，我唔係講緊不文嘢，而係講緊心理學問題，即係「價值觀是如何形成的」呢類嚴肅嘢。
「情感催化劑」可以係歌，可以係電影，亦可以係小說。不過根據觀察，歌對人嘅影響較大，呢層可能同歌可以無限Loop有關。唔開心嘅時候，搵一首悲情歌，成為自己嘅主題音樂，不停咁Loop，不停咁唱，當正自己係曲中主角咁。慢慢，你會開始迷上呢位歌手嘅每首歌，甚至佢嘅人生態度，而我就喺咁嘅情況下，鍾意王傑。
王傑係我少時至今，最喜愛嘅一個藝人，佢嘅歌以至佢嘅戲，我通通鍾意。記得佢當年有套唔係咁多人知嘅電影叫《戰龍在野》，我睇咗幾次，內裡嘅主題曲《紅塵有你》(廣東話版叫《夢全是你》)，更加係我經常Loop嘅音樂之一。
有一段時間，我失意嘅時候，總會戴上耳筒，聽住王傑嘅歌，喺街行來行去，舊歌如《多少次》、《假如能夠》，新少少好似《愛不起》、《我會知道幾時要退》，我全部識背。當然，我對呢位歌手更加熱愛，係得知佢真人經歷之後。
有啲人唱慘歌，但佢本身完全唔慘，結果唱出來，難免技巧多過感情，因為不知苦為何物。王傑絕對冇呢個問題，因為佢夠晒慘，根據報道所言，佢離過兩次婚，而且大部分遇過嘅女人，都係為咗錢，得閒叫佢買車買靚嘢，有時買完，甚至立即失蹤，要車唔要人，仲試過同一個「一腳踏五船」嘅女人拍拖。感情上嘅經歷，不禁令佢覺得︰「因為我是王傑，我不是王傑，還會不會喜歡我？」一個受傷嘅人，唱出嚟嘅歌，點可能冇味道？
每次，當我覺得自己22戰22負慘絕人寰，我都會聽返王傑，提醒自己，其實我已經好幸福。
獨的格言︰畀女神漠視一眼就話慘嘅人，其實很幸運，因為佢未試過畀人傷得更深。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場。
