【A&M Diary】講起食辣嘢，唔少人第一時間會諗起川菜，令同樣以辣為主導嘅湘菜被世人遺忘。其實湘菜同川菜由香料以至烹調方法，都有好大分別，最簡單嘅例子，湘菜嘅辣係無麻嘅感覺。嚟到屯門嘅湘聚小館，品嚐正宗嘅湘菜香辣味道。
農家一碗香
就咁睇個名，係咪完全唔知係咩嚟呢？其實佢係湘聚小館嘅招牌菜：湖南辣椒炒肉，再加上炒蛋、雲耳、湖南螺絲椒、爽口彈牙嘅土豬肉，以及秘製醬汁，非常惹味，唔會太辣，非常開胃！
茶油炒土雞飯
金黃色嘅雞油撈埋香噴噴嘅白飯，真係又邪惡又好食呀！土雞用咗辣椒薑片炒香，入口帶有微辣嘅感覺，而辣味會慢慢喺舌尖化開，辣得夠驚喜！
小炒黃牛肉
湖南菜出名辣，呢道小炒黃牛嘅辣度絕對不容小覷！因為係現切現炒嘅關係，牛肉依然保持鮮嫩爽滑，加上炒香左嘅蒜粒、芹菜條、辣椒等，辣度簡直係直線飆升，非常過癮！
