【A&M Diary】初初嚟觀塘返工嘅時候，真係非常唔習慣，因為喺觀塘食lunch真係好似打仗咁，間間餐廳都排晒長籠！但後嚟識搵食，先知觀塘有唔少工廈食肆，而餐廳質素味道都相當唔錯！今日就約埋K同事去到觀塘Bella Shine，餐廳主打日式西餐，份量非常豐富。
前菜
前菜有蒜蓉包、餐湯或沙律，今日嘅餐湯係南瓜忌廉湯，南瓜鮮甜，非常綿滑，好creamy；沙律份量十足，沙律菜充滿胡麻醬，非常開胃好味。特別一讚係個蒜蓉包，烘得非常脆口，蒜蓉味濃。
香煎加拿大豬鞍配薯菜
豬鞍雖然厚切，但肉質彈牙軟腍，唔會煎得太乾，保持大量肉汁，肉味香濃juicy！配上獨特嘅醬汁，令豬鞍嘅味道大大提升，好有層次。配菜方面有薯條同沙律菜，整體嚟講非常豐富。
牛肉漢堡包配薯菜
牛肉漢堡由多層餡料組成，有生菜、芝士、煙肉同牛肉漢堡，一啖咬落去真係有啲難度！牛肉比較薄切，而且較乾身，會略為失望，但勝在其他配料同醬汁搭夠，加上麵包採用竹炭麵包，非常軟熟，整體嚟講都算合格。
