【Now新聞台】截至早上11點， 1小時內《彭博》用戶關注度上升最多的港股，依次為雅生活服務、碧桂園服務、恒騰網絡、中國華融、美團。
今朝市場最關注應該係開市前碧服停牌，果然又係配股集資。據銷售文件披露，公司計劃以每股53.35元，配售1.5億新股，籌80億元，較噚日收市價折讓9%。
碧服今年5月先配過股同發可換股債券，集咗150幾億，截止6月底止，現金等價物逾219億元，點解仲要抽水？
英皇證券銷售部副總裁林建華認為，佢係為咗幫母企碧桂園撲水，但折讓比預期細，相信復牌後股價可以企穩。
另一邊廂，雅居樂發24億雅生活CB，息率7厘，初步換股價27.48元，較噚日收市價有20%溢價。
林建華認為，雅居樂有資金需要，但配售「阿囝」股份，未必代表減持都冇人要，反而係想維持自己嘅持股比例。
佢又話，相較其他內房龍頭高達10厘，雅居樂CB得7厘息，應該更多人願意買。不過，換股價高現價20%，加上內房前景堪憂，投資者似乎冇換股誘因。
